Lééf mooi 2019-09-01T13:07:10+00:00

Lééf mooi

Die wonder van vitamien C

Deur Christine Ferreira | Foto verskaf

Laat die krag van vitamien C vir jou vel werk. Dit gee ‘n dowwe vel nuwe lewe.

Wanneer laas het jy nou jou vel gekyk en gedink dat dit ‘n mooi gesonde gloed het en glad en deursigtig lyk? Moenie moedeloos voel nie. Daar is hulp vir jou moeë vel. Die jongste deurbrake op die gebied van vitamien C het dermatoloë in staat gestel om die krag van dié vitamin in olie-oplosbare vorm by die formules van vogrome en ander middels te voeg om só te help teen ‘n dowwe, verouderde vel.

Vitamien C is by uitstek ‘n antioksidant en help om die vel se tekstuur te verbeter en dit jonk en vars te laat gloei. Jou liggaam is nie in staat om self vitamien C te produseer nie. Dis daarom nodig dat jy groot hoeveelhede daarvan by jou dieet insluit. Helderkleurige groente en vrugte is dikwels ‘n wonderlike bron van vitamien C. Rooi soetrissies, brandrissies, pynappels, aarbeie en lemoene is ook propvol gesonde vitamien C – ‘n helende, lewensnoodsaaklike voedingstof wat ‘n reuse-verskil aan die gesondheid van jou vel maak.

Die voordele van vitamien C

  • Vitamien C verhelder jou vel en verbeter die voorkoms van die velkleur.
  • Daar is bewys dat vitamien C die sintese van kollageen verhoog. Hoe gesonder en digter die kollageenweefsel, hoe beter lyk die vel.
  • Vitamien C is een van die primêre antioksidante as dit kom by die beskerming van die liggaamsweefsel teen vrye radikale. Dit neutraliseer reaktiewe suurstofmolekules wat die vel beskadig.
  • Vitamien C help om vitamien E te hersirkuleer, wat die lipiede en selmembrane teen vrye radikale beskerm.
  • Vitamien C help om die skade wat deur die son aangrig is te herstel en die vel teen verdere skade te beskerm (as bestanddeel in sonbeskermingsroom).
  • Omdat dit die produksie van melanien verminder, verbeter vitamien C die voorkoms van pigmentasie en ouderdomsvlekke.
  • Vitamien C versterk die wit bloedliggaampies en verbeter só die liggaam se immuunstelsel.
  • Dit help om jou energie te gee. Vitamien C bevorder die produksie van noodsaklike chemikalieë in die liggaam soos L-Karnitien, wat noodsaaklik is om vet in energie om te sit.
  • Die senustelsel het vitamien C nodig in die produksie van neuro-geleiers, wat die liggaam help beweeg en funksioneer.

Dié velstoestande reageer goed op vitamien C

  • Fyn lyntjies en plooie by ‘n vel met sonskade.
  • ‘n Vel wat fermheid verloor weens die verswakking van die kollageenweefsel.
  • ‘n Sonbeskadigde of geïrriteerde vel.
  • ‘n Dowwe en lewelose vel sonder glans.
Gewone vitamien C is wateroplosbaar, terwyl die vitamien C-ester olie oplosbaar is.

Vitamien C-Ester

Dié teenverouderingsbestanddeel bestaan uit L-askorbiensuur of basiese vitamien C, wat met ‘n vetsuur (van palmolie afgelei) verbind word. Die chemiese binding tussen ‘n suur en ‘n alkalie word ’n esterbinding genoem. Dis die toevoeging van die vetsuur wat die eintlike verskil maak by die behandeling van die vel. Gewone vitamien C is wateroplosbaar, terwyl die vitamien C-ester olie oplosbaar is. Dit is in staat om die dun selmembraan te penetreer en die sel van binne af teen aftakelende vrye radikale te beskerm. Nog ‘n voordeel van vitamien C-ester is dat dit baie stabiel is en lank aktief bly – dit kan dus met sukses in die formulering van skoonheidsprodukte gebruik word.

Produkte om te probeer

  • Dermalogica biolumin-c serum. Hierdie serum is tans een van die vier topverkopers onder Dermalogica-produkte wêreldwyd. Die uiters effektiewe serum span onder meer die krag van vitamien C in om die vel se gesondheid en voorkoms te verbeter en is deur intensiewe navorsing en kliniese toetse gerugsteun. Dermalogica vier boonop vanjaar hul 25ste bestaansjaar!
  • pHformula Vita C Mask Bright Overnight. Dié masker is provol vitamien C en word oornag aan die gesig gelaat. Dit bevat onder meer sjeabotter en lemoenolie wat help om die vel te versag, te verhelder en te vernuwe. Die vel lyk na gebruik varser en plomper. Dié masker behoort twee tot drie keer per week gebruik te word.
  • Endocare C Pure [concentrate] Brightening Antiaging Dermal Regeneration. Hierdie is ‘n kragtige reeks ampules wat twee keer per dag aan die vel, nadat dit gereinig is, aangewend word om die sigbare tekens van veroudering teverminder en die vel te verhelder. Dit streel fyn lyntjies weg en versag plooie. Die vel se fermheid word ook hierdeur verbeter.
  • Elizabeth Arden Vitamin C Ceramide Capsules Radiance Renewal Serum kombineer die krag van vitamein C en keramiede om die vel te verhelder en te vernuwe. Elke kapsule wat aan die vel gesmeer word, bevat 178 keer meer vitamien C as gewoonlik. Die kragtige formule beskerm die vel teen aggressors van buite en skep ‘n egalige gelaatskleur. Dit versterk boonop die vel se kollageen en elastienweefsel. Natuurlike bestanddele soos salie, avolkado- en sonneblomolie word by die formule gevoeg om die werking van die serum nog verder te verbeter.