Sperm Skenker

Ina, ek persoonlik sou nie so iets doen nie. Skuus vir my blatante mening. Ek dink nie dit kan die wil van God wees om 'n persoon se sperm te gebruik waar jy nie eers weet wat die rede was vir die skenking daarvan nie. Daar is weird mense op hierdie aarde en jy gaan met so 'n besluit "deel uitmaak" van so 'n groep. Dit is willens en wetens 'n besluit waar daar geen liefde by bedoel is nie. Net selfsug. Alhoewel baie swangerskappe ook maar as gevolg van selfsug gebeur, is hierdie besluit wat jy so neem afgemete en net die inagneming van jou eie wil omdat jou behoefte aan 'n eie kindjie die grootste begeerte in jou lewe is. Ek sou my gebede verander en God eerder vra om jou pad vir jou gelyk te maak oor wat jou te doen staan. As jy baie baie bid en aanhou soos die weduwee met die regter in die Bybel, SAL Hy jou 'n antwoord gee. Hy het self daardie belofte gegee. Vertrou Hom. Iets wat jy sonder twyfel kan weet wat binne Sy wil is is om 'n kindjie aan te neem wat in nood is. So kan ons ons geloof in dade omsit. Sterkte vir jou en jou warboel van gedagtes. Probeer altyd die Here behaag met jou oorwegings.

Skuus jong, ek het 'n verkeerde naam gebruik Pop.

Koti,ek wonder net of jy self enige kennis dra van infertiliteit en al die warboel dinge wat daarmee saam gaan.Ek wil net se dat daar baie mense is wat hul sperms en eiers doneer nie vir "weird" redes en uit selfsug nie,maar omdat hulle werklik graag ander mense wil help,net soos wat mense hul organe skenk. Ek weet eerlik nie wat ek in Pop se situasie sal doen nie,maar ek dink ook nie dit is regverdig om ander mense se goeie werke as "weird' af te maak nie.Ek wens ek het presies geweet hoe God hieroor voel,maar ek weet nie,so ek ioordeel nie! Pop ek bid saam met jou dat God vir jou en jou man leiding en antwoorde op jou vrae sal gee.Baie Sterkte!!!!

Ai, ai, ai, Koti, ek het so baie om vir jou te sê - ek weet nie waar om te begin nie. Hou asseblief jou "weird" raad vir jouself - duidelik weet jy nie waarvan jy praat nie! Ek hoop jy het gister jou moedersdag geniet. Gun dit ook vir ander van ons wat nie so bevoorreg is om 'n moeder genoem te kan word nie.

Ek het geen raad, maar moedig jou aan om hierdie diep persoonlike keuse saam met God te maak. Nie saam met mense of ander mense se opinies nie. God se opinie alleen maak saak, en Sy Woord het 'n opinie oor alles! Die Here sal vir jou antwoorde, riglyne en bemoediging verskaf. Daar is klomp menings oor vrugbaarheids behandeling en in die besonders sperm skenkers. Maar dis mense se opinies. Vra God s'n - Hy ken jou hart en omstandighede beter as enige iemand anders.

Liewe Pop, ek kan maar net sê skerkte met die groot besluit wat jy en jou man moet neem. Ek en my man stap ook al agt en 'n half jaar hierdie aaklige pad van kinderloos wees, dokters sien, behandelings ondergaan en duisende rande wat spandeer word om net jou eie kind te kan hê. Ons het ook al drie KI's gehad waarvan al drie negatief was. Nou spaar ons weer geld vir ons eerste invitro bevrugting. Ek wonder of Koti weet hoe krap mens R25 000 bymekaar terwyl jou biologiese klok so hard tik dat mens nie meer die Here se stem kan hoor of meer enige raad vir jouself het nie! Al wat ek hoor is 'n klok wat tik en elke jaar word my kanse minder en minder om swanger te word. My skoonma het nou Aprilmaand na ons derde negatiewe uitslag vir my gesê sy voel ook ons moet maar voortgaan met die behandelings terwyl ons nog iets kan doen. Mens kan altyd weer geld bymekaar maak, maar as jou tyd verby is om kinders te kan hê is dit verby! Niemand kan eintlik vir jou raad gee nie. Dis 'n besluit wat jy en jou man self moet neem. Mag die Here julle help in julle besluit en vir julle toevou in sy liefde en genade!

Hi Pop! Ons het self 10 jaar gesukkel om swanger te raak. Ons het alles gelees oor die onderwerp en van dokter tot homeopaat tot fertiliteitskliniek besoek. Ons is aangeraai om 'n eierselskenker te gebruik want my hormoonvlakke het daarop gedui dat die kwaliteit van my eierselle nie goed genoeg is om selfs met in vitro bevrugting swanger te raak nie. My hart het in duisend stukke gebreek, hoe kon ons so 'n besluit maak? Ons het 'n tweede opinie gekry met dieselfde diagnose. Die dokter het ons verwys na 'n maatskaplike werker wat by Tukkies doseer en haar doktersgraad gedoen het op die impak van skenker spermselle op paartjies wat die roete gevolg het om swanger te raak. Sy het een belangrike ding vir ons gese: ons is in die eerste plek as egpaar 'n span en dit is uiters noodsaaklik dat ons as 'n span in dieselfde rigting trek. My man was van die staanspoor bereid om die skenker roete te volg. Ten minste sou ek die swangerskap so self kon beleef. Dit was egter nie vir my so maklik om die besluit te neem nie, en ek het lank met die Here hieroor gestoei. 'n Boek wat ek kan aanbeveel is "The Infertility Companion" van Sarah L. Glahn. Dit is uit 'n Christelike oogpunt geskryf en behandel die A-Z van onvrugbaarheid. Ons het uiteindelik die besluit geneem om in vitro bevrugting met skenkereierselle laat doen, en ek moes 2 weke wag na die inplanting om 'n positiewe swangerskap met 'n bloedtoets te bevestig. Dit is die sieldodenste tyd van vrugbaarheidsbehandeling! Die Sondag voordat ek die bloedtoets moes laat doen preek die dominee uit Ef3:20 "Aan Hom wat deur sy krag wat in ons werk, magtig is om oneindig meer te doen as wat ons bid of dink, aan Hom kom die eer toe". Die volgende dag laat ons die bloedtoets doen, en kry vir die eerste keer in 10 jaar 'n positiewe uitslag! Ek is swanger met 'n tweeling! Ons seuntjie en dogtertjie word op 32 weke gebore en al is hulle prematuur babas word ons daagliks geseen met hulle vordering. Die kinders word na 'n maand ontslaan en het tot op datum 14 maande later nie enige gesondheidsprobleme nie. Boonop het ek 'n maand na hulle eerste verjaarsdag uitgevind ek is weer swanger! Op 38 en met ons geskiedenis van sukkel het ek nie gedink dit is moontlik nie, maar die Here het ons met 'n grootse wonderwerk geseen. In 20 maande groei ons gesin van 2 na 5! My raad aan jou is om vas te hou aan die wete dat ons wee nie Syne is nie. Hy sal dinge op die bepaalde tyd laat geskied. Moenie hoop verloor nie, want Hy weet wat Hy vir jou beplan, voorspoed en nie teespoed nie (Jer 29:11). Vra Hom vir wysheid en leiding in hierdie besluit en neem as 'n span 'n besluit wat vir julle altwee aanvaarbaar is. Ek weet nie wat die prosedure met spermskenkers is nie, maar ons het ons eierskenker deur 'n agentskap gekies wat die skenkers keur. Die fertiliteitsklinieke doen ook sielkundige en mediese evaluasies voordat so 'n persoon as 'n skenker kan kwalifiseer. As julle sou besluit om voort te gaan, kies 'n professionele kliniek/dokter wat die wetlike aspekte nakom. Ek beskou hierdie kinders as my eie, en al is hulle 'n handvol is ons elke dag diep dankbaar vir die voorreg om hulle ouers te wees!