Die ewige kwessie van gewig

So 2 weke gelede blog ek die eerste keer vir Leef en kies spesifiek `n dubbelsinnige tema “Wil jy ook ‘weer’ maer word in 2010?”  Die inhoud van die blog was egter oor die oppervlakkigheid van ons nuwe jaarsvoornemens en my bekommernis oor 2 groepe mense:  die een te moeg en die ander te arm om oor iets te droom in 2010. 

4 Mense lewer kommentaar op die blog – elkeen met `n dieet tip wat werk!  
Ek dog eers ek het my punt nie goed genoeg geskryf nie, maar nee.  Die eintlike waarheid is, voorkoms is `n reuse issue vir ons vrouens.  Soveel so dat ons enigiets wat lyk na `n kortpad na maer word, opslurp vir soet koek.  En die media weet dit verkoop!  Ons naïwiteit word skaamteloos uitgebuit met voorblaaie soos “Die Nuwe 3 Dag Dieet” en “Verander jou Metabolisme vir altyd” (of “Wil jy ook ‘weer’ maer word in 2010”!) 

Die kansels is tjoepstil oor die onderwerp terwyl die helfte van alle vrouens hulle liggame geheel en al haat en die res nie weet wat om op `n Sondag aan te trek kerk toe nie!
In hierdie blog sal ek wel erken dat dit vir my ook `n issue is.  Dat hoe ek voel oor myself en my gewig my letterlik kan maak of breek vir die dag.  Na jare se stoei, het ek hier in my binneste 2 dinge vir myself uitgeklaar:  

1. Doen iets daaraan!  Net die feit dat ek `n plan het, al is daar nog geen resultate nie, laat my beter voel.  Maak my losser van myself en meer beskikbaar vir die koninkryk.  As jou uiterlike jou soveel pla dat jy nie jou innerlike kan gebruik nie, is dit rede vir ondersoek en herstel!   
2. Maar kyk ook na die balans tussen uiterlike en innerlike:  Die hoeveelheid aandag, kopspasie, tyd en moeite wat jy aan die buitekant spandeer:  hoe weeg dit op met die hoeveelheid tyd, moeite en planne vir die binnekant?  

Ek gun elkeen van ons om vry te kom van die las van voorkoms en om al die ander genadegawes wat ook vir ons geleen is, te geniet, en vir ander te bied...