Lééf wys 2019-10-31T19:01:20+00:00

Lééf wys

God sál voorsien

Deur Bruce Wilkinson | Foto Pexel

Bring vandag jou bekommernisse oor finansies, werk en die ekonomie in gebed voor God.

Finansiële probleme

Vrees oor ons geldsake lê dikwels soos ’n swaar las op ons emosies. Ons dink nie altyd aan geld nie, maar soms voel dit soos ’n wolk wat laag oor ons hang en ons dae donker laat lyk. Dit is omdat so baie van die dinge wat ons doen – en so baie van ons keuses – deur ons finansiële vermoëns bepaal word.

  • Sal ons dit kan bekostig om ons kinders na ’n goeie universiteit te stuur om te gaan studeer?
  • Sal ek die kursus wat ek so graag wil doen, kan voltooi?
  • Kan ons die vakansie wat ons so dringend nodig het, bekostig?
  • Kan ons dit bekostig om gesonde kos te eet eerder as die goedkoop maar geprosesseerde kos wat so vrylik beskikbaar is?
  • Sal ons ons huur kan betaal?
  • En die motor se diens?
  • Versekering?
  • Mediese rekeninge?
  • Klere?
  • Die kinders se skoene?

Hierdie lys is eindeloos. Geld speel regtig ’n groot rol in elke besluit wat ons neem. Daarom is dit verstaanbaar dat so ’n belangrike faset van ons lewe tot bekommernis en angstigheid kan lei. Maar het jy geweet die teenmiddel vir angstigheid oor ons geldsake wat ons in God se Woord vind, sê in werklikheid ons moenie so baie waarde aan geld heg nie? Weer en weer sê die Bybel vir ons ons moet aan geld die regte plek toeken. “Om God én die geldgod saam te dien, is onmoontlik” (Matt. 6:24), en: “Waar jou skat is, daar sal jou hart ook wees” (6:21).

God wil hê ons moet verstaan dat as ons ons hoop op die onsekerheid van geld plaas, ons voortdurend in ’n toestand van emosionele onsekerheid sal wees. God self sal vanuit sy rykdom vir ons alles voorsien wat ons nodig het en wat ons kan geniet. Eerder as om bekommerd te wees of ons genoeg geld vir dit sal hê, kry ons die opdrag om ons tyd, talente en skatte tot voordeel van die mense rondom ons te gebruik. Ons moet alles wat ons het vrygewig en oorvloedig met ander deel.

Ons moet ook die waarheid in die Woord glo dat ons meer werd is as enigiets wat geld kan koop. Wat op die ou end die heel meeste saak maak, kom nooit uit geld voort nie – dinge soos liefde, verhoudings, waarde, doelwitte, diens en die Here. Ja, geld maak saak en ons almal het elke maand rekeninge om te betaal, maar jy sal ’n verkwikkende waarheid ontdek wanneer jy die bande rondom jou geldsake so ’n bietjie skiet gee en jou geld begin gebruik om ander mense meer as ooit voorheen te help. Onthou, “om na ’n arm mens om te sien, is ’n lening aan die Here. Hy sal jou daarvoor vergoed” (Spr. 19:17).

Soek God se teenwoordigheid in gebed

Moenie vir julle hier op aarde skatte bymekaarmaak waar mot en roes dit wegvreet en diewe inbreek en roof nie. Maak vir julle skatte in die hemel bymekaar waar geen mot en roes dit sal kan bykom nie, en waar diewe nooit sal kan inbreek en roof nie. Onthou, waar jou skat is, daar sal jou hart ook wees. ~ Matteus 6:19-21

Sê aan hulle wat ryk is in hierdie wêreld om nie trots te wees en op hulle geld te vertrou wat spoedig sal verdwyn nie. Maar hulle vertroue moet in die lewende God wees wat aan ons ryklik alles skenk wat ons nodig het om die lewe te geniet. Sê hulle moet hulle geld gebruik om goed te doen. Hulle moet ryk wees in goeie dade en moet ruim gee aan dié in nood; hulle moet altyd gereed wees om wat God aan hulle gegee het, met ander te deel. Deur dit te doen, sal hulle vir hulle ’n skat opbou – ’n goeie fondament vir die toekoms sodat hulle die egte lewe kan ontvang. ~ 1 Timoteus 6:17-19

Toe het Hy gesê: “Pas op! Moenie gierig wees nie. Ware lewe word nie gemeet aan hoeveel ons besit nie.” ~ Lukas 12:15

Bid tot God

Maak my ’n instrument van u seëninge, Here, sodat wat U aan my gee deur my na ander mense sal vloei. Ek weet dat ek my oë van U af wegdraai en dit op die geldgod rig wanneer ek bekommerd raak oor al die rekeninge wat ek moet betaal en dink aan al die dinge wat ek so graag wil doen. Vergewe my dat ek my besittings as belangriker as U, die Skepper, beskou. Help my om U te verheerlik met die eerste vrugte van alles wat U aan my gee. Wys vir my hoe vrygewig U is en gee aan my u perspektief op geld sodat ek nie verstrik sal raak in die lokval van rykdom of aan die duiwel ’n kans sal gee om my te verlei om sonde te doen nie.

Ek gee my kommer en angs oor my geldsake aan U oor. Ek gee dit alles in u hande en vra dat U dit ver van my af sal wegneem. Vervang dit met ’n vrede wat alle verstand te bowe gaan en ’n vrygewige gesindheid teenoor mense in nood. Skenk aan my die vreugde wat spruit uit opregte hulp aan ander mense. Leer my om u wil te doen, o Here, want dit is in my gehoorsaamheid aan U dat ek vrygemaak sal word. In Christus se Naam. Amen.

God is die bron van alles wat jy ontvang.

Werksekerheid

Die veiligheid van hulle werk, saam met die bevrediging wat hulle uit hulle werk put, is twee dinge waaroor baie mense bekommerd is. Dit maak sin aangesien die gemiddelde volwassene 30% van sy of haar lewe by die werk deurbring. As iemand 75 jaar oud word, sou hierdie persoon ongeveer 25 jaar van die 75 jaar by die werk deurgebring het. Dit is baie meer tyd as wat ons aan enigiets anders in ons lewe afstaan. Om ’n werk te hê waarvan jy regtig baie hou – of wat jy, ten minste, geniet – en om nie gespanne te wees oor die vraag of jy dalk jou werk gaan verloor nie, is vir ons almal ’n groot en normale behoefte. Tog is dit baie natuurlik om oor die veiligheid van jou werk bekommerd te raak wanneer jy in die lokval trap om te glo jou werk is die heel belangrikste bron van jou bestaansveiligheid.

Een van die konsepte in die Bybel wat die heel meeste verkeerd verstaan word, is dié van God se voorsiening. Dit is egter ’n konsep wat enigeen wat sukkel met bekommernis oor hulle werk baie sal help. Aangesien ons sterflike wesens is wat swaar, en soms geheel en al, op ons vyf sintuie staatmaak – op wat ons kan sien, proe, voel, ruik of hoor – skryf ons gereeld verantwoordelikhede aan mense toe wat slegs aan God behoort. Die veiligheid van ons werk is een van die fasette van ons lewe waar ons hierdie fout gans te dikwels maak.

Jou werkgewer gee vir jou die werk, maar God is die Een wat die werk voorsien. Jou werkgewer betaal jou salaris, maar God is die bron van jou inkomste. Jou toesighouer sê dalk vir jou wat om te doen, wanneer om dit te doen en hoeveel jy betaal sal word wanneer jy hierdie take uitvoer, maar God is die Een wat die werk voorsien.

Ongelukkig vergeet ons dit te maklik en rig ons oë net op die middelman. Ons raak bekommerd oor ons prestasies by die werk. Ons raak angstig oor die hoeveelheid werk wat ons het om te doen of nie het om te doen nie. Ons wonder of ons salaris steeds elke maand in ons bankrekening inbetaal sal word, of die maatskappy sal aanhou om die kommissie aan ons uit te betaal en of iemand anders ons dalk sal vervang. Dit is normale gevoelens en gedagtes. Ons almal voel die een of ander tyd vervangbaar.

Baie van ons is bekommerd dat die ekonomie ’n insinking sal beleef en dat dit die bedryf of die besigheidsektor waarin ons werk nadelig sal beïnvloed. Ons kyk elke dag na die nuus om te sien watter handelstransaksies die regering aangegaan het, en watter hulle van die hand gewys het. Ons wonder watter impak dit op ons werk en ons inkomste sal hê.

Afleggings. Rasionalisering. Besnoeiing. Noem dit wat jy wil: Gedagtes aan hierdie dinge kan tot angstigheid lei.

Die teenmiddel vir kommer oor die veiligheid van jou werk is om te onthou. Onthou Wie vir jou voorsien. Nie die regering nie. Nie jou werkgewer nie. Selfs nie eens die ekonomie nie. God is die bron van alles wat jy ontvang. Wanneer jy jou werk doelbewus aan die Here opdra – of jy nou ’n busbestuurder, ’n rekenmeester, ’n debatafrigter of enigiets anders is – God sal jou pad bepaal. God self sal vir jou krag gee en jou vas laat staan in jou diens aan Hom op die heel beste plek waar jy kan wees. Dit kan wees waar jy nou werk, of dalk wil God jou skuif na ’n ander plek wat selfs beter is. Moenie te veel fokus op waar jy werk nie; rig jou oë eerder op die Een wat vir jou die werk gee. Werkplekke en pligte kan verander, maar die Voorsiener verander nooit. En as die heel beste werkplek vir jou die plek is waar jy nou is, onthou altyd dat as God hierdie deur vir jou oopgemaak het, niémand dit kan toemaak of van jou af kan wegneem nie. God het ’n doel vir jou wat Hy wil hê jy moet bereik. En wanneer jy sy doelwit jou dryfkrag in die lewe maak, is jy ten volle veilig.

Soek God se teenwoordigheid in gebed

Alles wat jy doen, moet jy opdra aan die Here, dan sal jou planne slaag. ~ Spreuke 16:3

Hoe dankbaar is ek teenoor Christus Jesus ons Here. Hy het my krag gegee en betroubaar geag om my in sy diens te stel. ~ 1 Timoteus 1:12

As jy moeg raak om teen mense te hardloop, hoe sal jy ooit teen perde kan meeding? As jy struikel en val in ’n land waar dit veilig is, wat sal jy doen in die digte bosse by die Jordaan?

~ Jeremia 12:5

Bid tot God

Liefdevolle Verlosser, ek is bekommerd oor my werk. Ek weet nie of ek die beste persoon is om die werk te doen nie. Ek weet nie of ek my werk sal kan behou en of my werkgewer solvent sal bly nie. Ek weet nie wat ek sonder hierdie werk sal doen nie. Ek weet nie hoe ek al die rekeninge sal kan betaal en vir my gesin sal kan sorg nie. Ek weet nie eens of ek my woonplek sal kan behou nie. Ek het hierdie werk nodig, Here. Altans, dit is hoe ek voel en dit is wat ek glo. Maar u Woord sê vir my iets anders. U Woord sê vir my U kan op enige manier vir my voorsien. U is die Een wat my voetstappe rig en u plan vir my laat uitwerk.

Ek wil nie hê my werk moet ’n afgod word nie, maar wanneer ek daaroor bekommerd is, is dit presies wat dit word. Ek plaas dan meer geloof in my werkgewer as in U. Ek is jammer daaroor en bely my sonde, Here. Vergewe my en help my om die waarheid te ken en daarin te rus dat niemand dit wat U as myne verklaar het van my af kan wegneem nie. Ander mense is dalk slimmer, vinniger en lyk dalk meer professioneel as ek – maar as hierdie werk die diens is wat U van my verwag om te lewer, sal dit my werk bly. U sal in u genade die leemtes vul waar ek tekortskiet en beter resultate as enigiemand anders lewer. Ek maak op U staat en vra U om my te help om my werk na my beste vermoë te doen. U sal aan my die krag gee om dit te doen.

Here, wanneer ek dalk in ’n seisoen inbeweeg waar U van my sal verwag om ’n ander werk te aanvaar, help my om nie vertroue in U te verloor nie. Help my eerder om nog meer op U te vertrou, u woorde duidelik te hoor en U te volg waarheen U my ook al lei. In Christus se Naam. Amen.

Laat my vrees verdwyn wanneer ek nou my hart na U toe draai.

Ekonomiese insinking

Die impak van ’n ekonomiese insinking op mense se geestesgesondheid word al ’n eeu lank ondersoek. Selfdoodsyfers het gestyg van 12 per 100 000 mense voor die Groot Depressie tot 19 per 100 000 mense tydens die elf jaar lange insinking. Toe die aandelemark in 2008 ineengestort het, het ’n verskynsel bekend as “resessie-depressie” mense begin beïnvloed, ongeag of hulle hulle huise verloor het of nie. Weens hierdie krisis was daar meer afdankings en besnoeiings in die sakesektor en ’n algemene onsekerheid oor die nasionale ekonomiese gesondheid het feitlik alles deursyfer.

Kommer en angstigheid oor iets wat buite ons onmiddellike beheer lê, soos ’n ekonomiese insinking, het ’n invloed op ons almal. Ons is bekommerd oor hoe ons vir ons gesin gaan sorg. Ons weet nie hoe ons gehalte-onderrig vir ons kinders gaan bekostig nie. Ons weet nie hoe ons ons skuld sal kan afbetaal en ’n veilige lewe kan skep nie. Veral wanneer ons oor die nuus hoor dat ’n ekonomiese insinking dreig. Hoe oorkom ons die versoeking om bekommerd te wees oor die algehele finansiële toestand van ons land en die invloed daarvan op ons lewe?  Hoofsaaklik deur te erken dat God die opperheerskappy oor alles en almal het. Ten spyte van hoe alles lyk, is God in beheer. Rykdom en eer kom van Hom, en Hy heers oor almal. Dit beteken wanneer rykdom en eer buite ons bereik lê, soos in ’n tyd van ’n ekonomiese insinking, het God gekies om ’n seisoen van tekort en gebrek toe te laat. Hy hou al die krag en mag in sy hande vas, selfs wanneer ons nie sy redes verstaan nie.

Wanneer ons besef God kan vir ons voorsien – selfs in ’n tyd van ekonomiese insinking – sal dit ons ook help om ons vrees te verlig oor die onsekerheid oor wat ons sal kan doen wanneer ons geld opraak. Die profeet Elia het sterwend van die honger langs ’n spruit gesit nadat hy kilometers ver vir sy lewe gevlug het. Tog was God getrou. Hy het vir Elia voorsien deur die kraaie te beveel om vir hom kos te neem. Elke oggend en elke aand het die Here ’n voël gebruik om vir sy dienaar te sorg. God word nie ingeperk deur menslike grense wanneer dit by voorsiening kom nie. God kan oor sy eie grense tree, soos Hy inderdaad gemaak het toe Hy ’n kraai – ’n voël wat Hy vroeër onrein verklaar het – gebruik het om sy doelwit te bereik.

Een van die ergste dinge wat ons kan doen wanneer ons so bekommerd is, is om God te probeer inpas in ’n boksie wat ons self ontwerp het. God het miljoene maniere om te voorsien in die behoeftes van dié wat aan Hom getrou bly. God sal dalk nie voorsien op die manier wat jy verwag het nie, maar as jy getrou bly aan Hom en aan sy heerskappy oor jou lewe sal Hy jou nooit in die steek laat nie en jou kinders nooit vir brood laat bedel nie (Ps. 37:25).

Soek God se teenwoordigheid in gebed

Onthou altyd dat dit die Here jou God is wat vir jou die krag gee om ryk te word. Hy doen dit om die verbond na te kom wat Hy met jou voorouers gesluit het. ~ Deuteronomium 8:18

Aan U, Here, behoort die grootheid en heerlikheid, mag, roem en majesteit. Alles in die hemel en op die aarde behoort aan U, Here. Aan U behoort die koninkryk. U is verhewe bo alles. Rykdom en eer kom van U alleen, want U heers oor alles. Krag en mag is in u hand, om te verhoog en te versterk. ~ 1 Kronieke 29:11-12

Wanneer julle julle lande oes, moenie die graan tot teen die kante van die lande afoes nie. Moet ook nie alles optel wat die mense wat oes, laat val het nie. Los dit vir die armes en vir die vreemdelinge wat tussen julle woon. Ek, die Here, is julle God. ~ Levitikus 23:22

Bid tot God

Genadige Here, aan U behoort die beeste op die heuwels. U is die Skepper van alles. Die voorraadkamers in u koninkryk raak nooit leeg nie. Aan U behoort die grootheid en die heerlikheid, die mag, roem en majesteit – selfs alles wat in die hemel en op die aarde is. Aan U behoort die heerskappy, Here, en U is verhewe bo alles en almal. Vader, rykdom en eer kom van U en U is by ons betrokke, ongeag of ’n land voorspoed geniet en of die ekonomie ’n insinking beleef.

Omdat ek dit weet, Here, bid ek om u genade. Stort u genade deur die bloed van Jesus Christus uit oor ons land en ons ekonomie. Te veel mense in ons land eer U nie met die rykdom van hierdie land nie. Ons gebruik dit in werklikheid om ander mense te onderdruk en afgode te skep. Ek smeek U om u genade oor ons en oor ons land uit te stort, want dit is net deur u genade dat ons geseën sal word. Ons verdien nie u seën nie, Here, maar deur Jesus Christus is ons vrygespreek en dit is in sy Naam dat ek U om genade smeek.

Laat my vrees verdwyn wanneer ek nou my hart na U toe draai. Beperk my gedagtes oor wat met die ekonomie van ons land en selfs met my eie geldsake sou kon gebeur. Laat ek net dink aan vandag en wat vandag vir my bring. Môre het genoeg van sy eie bekommernisse. Ek kyk vandag na U toe op, Here, met die wete dat U die onderhouer van alle dinge is. Ek sal my vrede in U vind, want U gee die mag om rykdom te versamel en ’n land se veiligheid te verseker. In Christus se Naam. Amen.

Uittreksel uit Vry van vrees en bekommernisdeur Bruce Wilkinson (CUM 2019) met toestemming van die uitgewer gepubliseer.