Dagboek 2019-09-30T14:56:31+00:00

Dagboek

Vir Oktober

Lééf so… met hart & siel

Iets om oor na te dink

‘Ware vriende besef hulle kan los van mekaar groei, sonder om mekaar te ontgroei.’ Anoniem

Iets om te onthou

Herinnner jouself gereeld om oor alles te bid. Hou aan om vir jou kinders te bid en bely hardop dat God met elkeen van hulle is.

Iets om te bid

‘Here, help my om U dwarsdeur my lewe volkome te vertrou en deur alles my geloof te behou.’

Iets om te verklaar

‘In Sy liefde beklee Hy my, omvou Hy my en omhels Hy my; hierdie tere liefde omring my volkome.’ Julian van Norwich

Iets om te ontdek

Vind verukking in die alledaagse: verkyk jou aan die nuwe lig van elke vroeë oggend. Sien Sy rykdom in die natuur raak.

Iets om te vier

Jubel oor nuwe dinge. Verwonder jou oor ‘n God wat groter is as wat ons kan bid of dink.

Iets om te glo

‘Hy gee krag aan dié wat moeg is. Hy maak die magteloses sterk.’ Jesaja 40:29

Iets om neer te skryf

God is my Redder. Vir wie sal ek bang wees? In duisternis en versoeking is Hy vir my ‘n lig.

Iets om te doen

Vra die Here vir ‘n fyn aanvoeling in jou gees vir nuwe lewensrigtings. Droom saam met Hom oor jou toekoms.

Dagboek

  • Die Marietjie Skool vir intellektueel erg gestremde leerders se jaarlikse kuier- en koopmark vind plaas van 1 tot 5 Oktober. Vanjaar is ‘om te maak, te versier en te leef deur handgemaakte inspirasie’ die fokus. Daagliks van 09h00 tot 19h00 by Marietjie Skool in Secunda, Mpumalanga. Toegang is gratis.
  • Maak ‘n draai by die Paardeberg Pinotage-fees op Saterdag 12 Oktober. Die fees vind plaas van 11h00 tot 16h00 by die Vondeling-landgoed, Voor-Paardebergweg, Paarl. Kaartjies is teen R150 by Quicket beskikbaar. Kinders onder 18 kan die fees gratis bywoon.
  • Die derde jaarlikse Groot Plaasproe van Saterdag 12 tot Sondag 13 Oktober op Sandringham buite Stellenbosch beloof ‘n proe-ervaring van álles wat die plaaslewe bied! Nie net is daar plaaskos te kies en te keur nie; feesgangers kan ook meer as 300 plaasdiere van nader leer ken én boonop pryse wen met hul braai- en dansvernuf. Vir meer inligting, besoek diegrootplaasproe.co.za, volg die Groot Plaasproe op Facebook, Twitter of Instagram @grootplaasproe, of kontak Agri-Expo by 021 975 4440 of admin@agriexpo.co.za.
  • Die Foxwood Fees vind van 19 tot 27 Oktober by Foxwood House, Vyfdestraat 13, Houghton Estate, Johannesburg plaas en val die kollig op kuns, toneel, musiek, kos en die letterkunde. Van ons bekendste kunstenaars sal tydens dié kunsfees optree. Bespreek by skybookings.net of by theatre@foxwood.co.za.
  • Die gewilde Madeliefie Makietie-fees vind plaas op 25 en 26 Oktober op Strandfontein aan die Weskus. Lees meer by www.madeliefiemakietie.co.za.