Hartskos

Maaltye

Deur Christine Ferreira | Foto’s Myburgh du Plessis

In haar jongste kookboek, Maaltye, wys Christine Cappendale jou hoe om elke dag lekker en gesonde maaltye vir jou gesin voor te berei.

“Ek was nog altyd passievol daaroor om die mense om my te inspireer en te motiveer om te kook, bak, proe en met kos te eksperimenteer. Ek het eintlik my natuurlike roeping gevolg toe ek jare gelede in die onderwys gaan studeer het! Ek het baie jare lank kookklasse in my huis aangebied, en later het ek ’n pragtige ateljee in Langebaan gehad waar ek gewerk het. Toe ons Gauteng toe trek, het dit nie lank geduur nie of my nuut opgeknapte kombuis het ’n kook-ateljee geword waar ek weer klasse aangebied, gekook, gebak en – hopelik – ander geïnspireer het. Vandag is ons terug in Kaapstad en ek het twee pragtige kombuise, ’n klein funksielokaal (of skeppende ruimte) en ’n gastehuis waar ek weer eens kan doen waarvan ek nog altyd gehou het – kook, bak, proe, inspireer en eksperimenteer!

“My liefde vir kook en bak het op ’n baie jong ouderdom begin. My ma het my met groot geduld aangemoedig, want ek was altyd die een wat aangebied het om in die kombuis te help (hoewel nie juis met die opruimwerk nie!). Bak was my eerste liefde, maar kosmaak het gevolg toe ek lank genoeg was om die kastrolle by te kom en te roer.

“Om mense te onthaal is ’n belangrike deel van die lewe – of dit nou sonder seremonie, baie formeel of net ’n kort besoekie is – en ek probeer dit altyd spesiaal maak. Niks maak my gelukkiger as om saam met vriende, bure, familie of selfs vreemdelinge wat toevallig by ons opdaag iets te kan eet nie. Partykeer is dit net ’n bakkie sop en geroosterde ciabatta, ander kere ’n aansit-maaltyd. Wanneer ek onthaal, hou ek van ’n ontspanne atmosfeer waar vriende en familie soms kan hand bysit en tuis voel.

“Kook met die bestanddele waarvan jy hou. My gunstelinge is suurlemoene, koljander en – deesdae – Oosterse geure. En koop altyd die beste gehalte wat jy kan bekostig en in seisoen is. Ek glo dit is belangrik om te weet wat jy in jou liggaam sit, en jy sal weet as jy die een is wat die maaltyd maak! Ek probeer geprosesseerde kos vermy en gebruik dit net af en toe as ek geen ander keuse het nie, of as dit baie min verwerk en na aan die natuurlike produk is. Dink dikwels aan wat jy self graag wil eet, en bestee tyd aan die beplanning van gesonde maaltye.”

‘Om mense te onthaal is ’n belangrike deel van die lewe’

Peer-en-biltongslaai (links)

LEWER 4 PORSIES

Vir die beste resultate, koop ‘n stuk heel biltong en sny dit net voordat jy die gereg voorsit – varsgesnyde biltong se kleur is soveel beter! As jy nie van die sterk geur van gorgonzolakaas hou nie, kan jy dit weglaat of vervang met bokmelkkaas. Pere is deur die jaar beskikbaar en jy kan hulle vooraf posjeer en vir tot ‘n week in die yskas hou. Ek maak gewoonlik ‘n dubbele hoeveelheid pere en ons eet dit saam met jogurt vir ’n heerlike bederfontbyt.

350 ml sterk rooibostee
60 ml heuning
25 g sagte bruinsuiker
2 steranyssade
1 klein lemoen, sap uitgedruk en geskil (sny die skil in repe)
4 ferm pere, geskil en gehalveer (los die stingels aan)
50 ml balsemiekasyn
50 g okkerneute
100 g gorgonzolakaas, gekrummel
30 ml biltongpoeier
100 g baba-kruieslaaiblare
200 g klam biltong, in dun skyfies gesny
olyfolie om voor te sit

Verhit die rooibostee, heuning, suiker, steranys, lemoensap en -skil in ‘n kastrol oor matige hitte tot kookpunt. Voeg die pere by en posjeer vir 20 minute of tot net sag.
Skep die pere uit die rooibosteemengsel en hou eenkant. Voeg die balsemiekasyn by die mengsel, verhoog die hitte en laat reduseer tot ‘n stroop. Giet die stroop deur ‘n sif en en laat afkoel tot kamertemperatuur. Voorverhit die oond tot 180 °C.
Gebruik ‘n spanspekballetjiemaker en ontkern die pere.
Kap een derde van die okkerneute en meng dit met die gorgonzolakaas en biltongpoeier. Skep die mengsel in die holtes van die peerhelftes.
Plaas die peerhelftes op ‘n bakplaat wat met bakpapier uitgevoer is en bak vir ongeveer 10–15 minute totdat die kaas begin smelt.
Plaas die slaaiblare op dienborde, skep die warm pere bo-op en strooi die biltongskywe en die res van die okkerneute oor.
Skep van die gereduseerde balsemiekasynstroop en ’n skeut olyfolie bo-oor en sit dadelik voor.

Hoender-en-soetrissie-quesadillas (regs)

LEWER 4 PORSIES

Hier is ‘n maklike manier om quesadillas vir ’n paar mense voor te sit – jy kan alles vooraf berei en die quesadillas net in die oond sit wanneer jy hulle nodig het. Probeer ook verskillende vulselkombinasies, maar maak altyd seker dat die vulsels heeltemal afgekoel is voordat jy die quesadillas aanmekaarsit sodat hulle lekker bros en krakerig bly. As jy net een of twee quesadillas maak, kan jy hulle een vir een in ’n pan op die stoof braai.

20 ml olie
1 ui, dun gesny
1 klein rooi soetrissie, ontpit en in dun repies gesny
½ geel soetrissie, ontpit en in dun repies gesny
sout en varsgemaalde swartpeper
4 hoenderfilette, in blokkies of repies gesny ’n knippie rooipeper

5 ml braaispeserye of paprika
50 ml soet-brandrissiesous
30 g gekapte Peppadews
8 klaarbereide tortillas (sowat 22 cm in deursnee)
350 ml gerasperde kaas (gebruik cheddar- en mozzarellakaas om die helfte)
15 ml olie om oor die tortillas te verf suurroom en gekapte koljander vir voorsit

Voorverhit die oond tot 200 °C.
Verhit die helfte van die olie in ‘n kleefvrye pan oor matige hitte en soteer die ui totdat dit sag word en begin karamelliseer. Voeg die soetrissie by en braai vir nog 2 minute. Geur na smaak, skep uit die pan en laat eenkant afkoel.
Meng die hoender, die res van die olie en die speserye goed. Braai dit in dieselfde pan oor hoë hitte tot goudbruin en gaar.
Voeg die hoender, soet-brandrissiesous en Peppadews by die ui-en-soetrissiemengsel en laat heeltemal afkoel.
Voer ‘n bakplaat met bakpapier uit en plaas dit in die oond om warm te word terwyl jy die quesadillas aanmekaarsit.
Deel die vulsel tussen die 8 tortillas en sprei dit uit oor die een helfte van elke tortilla. Strooi die kaas oor die vulsel en vou elke tortilla in die helfte. Druk die vulsel stewig vas.
Verf die tortillas (onder en bo) met die 15 ml olie en plaas op die warm bakplaat.
Bak die quesadillas vir 6 minute, draai hulle om en druk effens plat met ’n eierspaan en bak vir nog
6 minute totdat hulle bros is.
Sny die quesadillas in die helfte en stapel opmekaar. Sit dadelik voor met suurroom en gekapte koljander (of sit die suurroom en koljander in aparte bakkies voor).

Ander voorstelle vir vulselkombinasies:

Spinasie, fetakaas en gekaramelliseerde uie
Dungesnyde beeslendeskyf met peperwortel, gekaramelliseerde uie, baba-spinasie en kaas
Geurige maalvleis met bone en cheddarkaas
Baba-tamaties, basiliekruidpesto, feta- en mozzarellakaas
Heelpitmielies, gekapte sprietuie, cheddarkaas en skyfies chorizo

‘Kook met die bestanddele waarvan jy hou’

Gerookte soet-en-suur-varkvleis (links)

LEWER 4 PORSIES

Soet-en-suur-varkvleis is vandag een van die gewildste Chinese geregte in die Westerse wêreld. Die vleis moet lekker bros gebraai word en die sous moet ’n goeie balans tussen soet en suur hê – die sitrusgeur in hierdie resep voeg ’n lekker onverwagse kinkel by. Die gerookte geur in die vleis sorg vir nog ’n heerlike verrassing, maar jy kan ook gewone varkfilet gebruik.

400 g gerookte varkfilet, in happiegrootte stukkies gesny
125 ml koekmeel, gegeur met sout en peper 2 eiers, geklits met 30 ml water
250 ml panko-broodkrummels
20 ml olie
1 ui, in wiggies gesny
2 knoffelhuisies, fyngedruk
5 ml gerasperde gemmer
1 klein pynappel (ongeveer 300 g), in happiegrootte stukkies gesny

60 ml bruinsuiker
200 ml varsuitgedrukte lemoensap fyngerasperde skil van 1 suurlemoen
75 ml rysasyn
25 ml sojasous
sout en varsgemaalde swartpeper na smaak 30 ml mielieblom, gemeng met 50 ml
water om ’n pasta te maak
sonneblomolie vir vlakbraai
5 ml gekapte brandrissie (of na smaak) mikro-kruie en suurlemoenwiggies vir voorsit

Rol die stukkies vleis in die meel, doop in die geklitste eier en dan in die broodkrummels – druk die krummels liggies vas om die vleis goed te bedek. Plaas in die yskas terwyl jy die sous maak.
Verhit ’n bietjie olyfolie in ’n kastrol oor matige hitte en braai die ui, knoffel en gemmer totdat die ui begin bruin word. Skep uit die kastrol en hou eenkant.
Giet nog ’n bietjie olie in die kastrol en voeg die pynappelstukkies en 30 ml van die bruinsuiker by. Braai die pynappel totdat dit begin karamelliseer.
Skep die uiemengsel terug in die kastrol en voeg die res van die bruinsuiker, die lemoensap, suurlemoenskil, rysasyn en sojasous by. Geur met sout en peper en laat prut vir sowat 5 minute oor lae hitte.
Voeg die mielieblompasta by en roer totdat die sous begin verdik. Pas die geurmiddels aan indien nodig en hou eenkant.
Verhit genoeg sonneblomolie om die boom van ’n braaipan te bedek oor matige hitte en braai dan die krummel-varkvleisstukkies alkant gaar tot goudbruin en bros. Laat dreineer op kombuispapier.
Sit die vleis saam met die soet-en-suur-sous, gekapte brandrissie, mikro-kruie en suurlemoenwiggies voor op noedels of rys.

Geskroeiroosterde hoender-en-mielieslaai met basiliekruid en feta (regs)

LEWER 4 PORSIES

6 hoenderborsfilette
10 ml olyfolie
5 ml braaispeserye
200 g baba-tamaties, gehalveer
1 klein Engelse komkommer, gesny
200 ml ontpitte, gedreineerde kalamata-olywe
2 gaar groenmielies, mieliepitte afgesny
1 blik (400 g) rooi nierboontjies, afgespoel en gedreineer
sout en varsgemaalde swartpeper
60 g wilderoketblare
200 g sagte fetakaas, in blokkies gesny
2 avokado’s, geskil en gesny

SLAAISOUS

50 ml basiliekruidpesto
30 ml suurlemoensap
40 ml olyfolie
gekapte vars brandrissie na smaak (opsioneel)

Kap die hoenderfilette effens dunner en ewe dik met ’n vleishamer.
Meng die olyfolie en braaispeserye, vryf oor die hoenderfilette en laat marineer vir sowat 15 minute. SLAAISOUS Voeg al die slaaisousbestanddele bymekaar en meng goed.
Plaas die tamaties, komkommer, olywe, mielies en nierboontjies in ’n bak, voeg twee derdes van die slaaisous by en meng.
Verhit ’n riffelpan oor matige hitte tot warm en skroeirooster die hoenderfilette vir sowat 4 minute aan elke kant tot goudbruin en gaar. Geur met sout en swartpeper.
Deel die wilderoketblare tussen vier dienborde en skep die slaaimengsel bo-op. Voeg die fetakaas en avokadoskyfies by.
Sny dan die hoenderfilette in repies en skep bo-op die slaai. Druip die res van die slaaisous oor en sit dadelik voor.

2019-03-31T11:06:31+00:00